Ziat, Vai, Hlang, le Sak: Bawi Hlawn Mang.

A hnia ah video in sik thil ii.

Ziat, vai, hlang, le sak: No Hlai Mang..

He tin rel fianhnak nai ii,...

(Mirang in East, West, South, Norh tin kohnak khiah, kin pupate in Nisuak hmun (East), Nikhum hmun (West), Hlang (South), Sak (North) tiin lo hmang hang lo ii. Ahlaice in, kin pupate in “South” le “North” khiah lo nai lo ang tluk ii. Ciamanin, tun kin san mino tampui in “Sak” le “Hlang” thu ah kin fiang thil tau de lo in ling iing.
East tu Nisuak hmun, West tu Nikhum hmun tin hmang de kin imanin, East le West thu ah tu rel pha umh lo tluk ii. Ciamanin, South le North thu ah a kau deuh in rel rih ngasing. Thupui kin lut hlan ah, Mizoram ai umhtute in, Burma ram khiah “khua chak” tin lo hmang in ling iing. Ciami Mizo pon ai “khua chak” tihnak sik in, Nisuak hmun lam khiah “Sak lam” tin lang tuh vehnak ii cuang lo ii. Amahte Mizo pon le kin pupate pong fangin, mah umh hmun ram ai Nikhum hmun lam ram, santehhnak in, Europe ram lam khiah “Hlang ram” tin lo ko de ii. Cen, kin pupate san ah tu, ramdang (foreign) fehtu hmuah khiah, “ramdang feh ii.” tiin lo hmang de ii. Cia zawnzawn ah, Kalaymyo dung, Chin Hill dung ai umhtute kim pupate in, Mandalay, Rangoon, Maymyo lam tlawngkaitute khiah “Hlangram ah tlawngkai ii.” tiin lo hmang de lehthio ii. Ciabangte kin sik fangin, Chin Hill an Nikhum hmun ai Europe ram lam feh khai “hlangram” tin ko pah, Chin Hill an Nisuak hmun lam ai Mandalay, Rangoon, Maymyo lam khai “hlangram” tin ti pah imanin, Hlang tihnak heh East khai, West khai a pahnih in huap veve ii. Ciamanin, minung tampui tu, East khiah “hlang” titu umh, East khiah “sak” titu umh iising.
I sentu I pa Sen Kap in I rel awnghnak kin Lairam ai kin pupate hmang daan pakhat tu, “Rawn hlunhlun ah na feh teng, na vak teng, na umh teng fangin, tii-hnar lam heh na sak ii, tii-luang hmun lam heh na hlang ii. Tlang vum ah na umh teng fangin, na umh hmun an a saang hmun lam heh na sak ii, a niam hmun lam heh na hlang ii.” tiin I cuuk awng ii. Ciami sik fangin, kin pon ah, sak le hlang heh South le North thawn pehzomdunhnak umh lehthio lo ii.
Cia zawnzawn ah, miphun dang, pon phundangte in nai le nai lo tu ling hlah ingkhaw, kin pon ah “ziat” le “vai” khai nai lai iising. Ciami “ziat” le “vai” tu: Rawng hlunhlun ah na umh teng fangin, tii-hnar lam a hong lam in na umh teng fangin, na ziat ah ti lekhaw, na kekeh lam, na vai ah ti lekhaw, na kiahhan lam, rawn tii a luang lam na feh teng fangin khai, na ziat ah ti lekhaw, na kekeh lam, na vai ah ti lekhaw, na kiahhan lam tiin I cuuk awng in hih iing. Ciamanin, ziat le vai heh ziat tu kekeh lam (left), na vai ah ti lekhaw, kiahhan lam (right) tiin hih iing. Pakhat niu I khel pang ni maw tin I ruathnak tu, ziat heh kiahhan sawn, vai heh kekeh lam sawn ti niu heh 100% hih lo hang iing. Hemi ziat le vai hmang daan khai kin pupa pon ah pon sunglawi pakhat lo ii hlen napui ii.
Kalaymyo an Chawngkhuah feh tuh fangin, Chawngkhuah hong ta rih ngang titu khai umh de ii. Cen, Chawngkhuah, Tazakung dung ai umhtute inkhai, Kalaymyo zukzu rih ngang titu khai umh de ii. Aisu dik sawn ni? Ruat pha tampui umh lehthio ii.
Ciamanin, kaimah I hmang daan, I ruat daan a dik ber tuhin I ruathnak tu, ram zuk, Lailungpui zuk, ciate sik in a saang hmun lam (North) lam hmuah heh “sak” tin hmang ai, a niam hmun lam (South) lam hmuah heh “hlang” tiin hmang de iing. I hmang daan bangin pong tuh ifangin tu, Kalaymyo an Chawngkhuah lam feh fangin, “a zu” tin hmang iing. Manlay, Rangoon lam feh tuh fangin khai world map sik fangin, a niam sawn ah umh imanin, “a zu” tin hmang iing. Kalaymyo an, Webulah feh tuh fangin, Kalaymyo tahhnak in sea level a saang hmun ah feh tuh imanin, Webulah hong tuh tin hmang iing. Chin Hill hmuah, Tedim, Tozang, Falam, Hakha, Matupi, Paletwa ciate veksen heh Kalaymyo tahhnak in sea level a saang hmun ah umh imanin, Kalaymyo an feh tuh ifangin, a hong ciang in hmang de iing. Ciahmuah heh Sak le Hlang, Ziat le Vai thu I ling daan niu ning hlawm ve iing. I nganhnak heh a dik ber, mi ruat daan tu dik lo tin ngawn ruathnak nai cuang lo iing. Lai siartu veksen naihhla.)

General Aung San fa Aung San Oo le Aung San Suh Gyi te in ro cuhdunhnak BBC in Aung San Oo thuzawthnak zavek.

Part (1)

Part (2)