Dawngpui thula: No Hlai Mang

Dawngpui Zarna Thu

Tunteng tu Dawngpui Zarna zuk le video hmu pha tam teng imanin, “Dawngpui Zarna” thu niu rel tlang, ruat tlang rih ngasing.

         Tunhlan kum 500 vum ah kin pupate in Dawngpui Zarna lo bawn zo ni maw ti heh lo ruat de iing. Zaikhai selai Tunhlan kum 100 dung ah tu kin pupate in Dawngpui Zarna lo bawn tuh de ii tiin um iing. Tun kin san ah khai kin pupate in kin hluphnak ro sunglawi tampui song an, Dawngpui Zarna khai ro sunglawi pakhat ii ti singlai khelh um lo iing. A sunglawi ngaai in kin hmang dehnak Dawngpui Zarna khiah, a hming ko dan a phuncang in ko lianglo de iising. Santehhnak in: 

 1. Dawngpui Zarna,

 2. Dawngpui Puai,

 3. Dawng Pui,

 4. Dawng Pui Puai,

 5. Dawngpui,

 6. Zanniat Dawngpui tibang in a phuncang in Lai khiah tar lianglohnak hmu de iising. 

            Hrekkhat in Dawngpui tu Puai tin hmang kuul lo ii titu khai umh ii. Kin pupate ko dan in tu, Dawngpui Zarna tin ko de in ling iing. Lai kin tar fangin, kin lai tarhnak heh phun khat lek in ngan tuhhnak in ling iing. Mah nuamhnak bangin ngan tuhhnak ngawn ii lo deuh baang ii. Santehhnak in, “Dawngpui” tihnak le “Dawng Pui” tihnak khai calai (literature) feh dan in tu, a sullam (meaning) bangdun lo ii. “Dawng” le “pui” a pahnih in a kop in ngan fangin, a sullam pakhat ii ai, “Dawng” le “pui” a tumce “Dawng Pui” tin ngan fangin tu a sullam a tumce ve ii.

             Kin ling fiang tuhhnak in, “Ku Ku heh I rualpui ii.” tihnak le “Ku Ku heh I rual pui ii.” tihnak a sullam bangdun lo ii. “Ku Ku heh I rualpui (friend) ii.” tihnak ai “rualpui” tu Mirang in “friend” tihnak sullam ii ai, “Ku Ku heh I rual pui ii.” tihnak ah tu, “rual” le “pui” a tumce in nganhnak imanin, Kawl pon in rel singlai, “rual pui” tihnak a sullam tu, “သူငယ္ခ်င္းၾကီး" tihnak ii. Ciatih bangin lai feh dan heh thu lo nai ve imanin, kin puai sunglawi kin naihsun niu “Dawngpui” tihnak khai laivum ram cangcang ah “Dawngpui” tin a kop in ngan tuh khiah zuam tlang ngasing. Cen, “Dawngpui” hnua ah “Zarna” tihnak niu heh hmang thiam tuhin zir tlang singlai pha tuhin um iing. Kin pupate hmang dan rori imanin, “Dawngpui Zarna” tin hmang tlang ngasing. “Dawngpui Puai” ti piangpo lo singlai tihnak niu thupui ngaai in ruat tlang in kin pon le lai mawi amam tuhin zuam tlang ngasing.
No Hlai Mang