Vailam(western) ai khawm hoitute laimi te pawl ziatlam(estern) ai khawm hoitute ang in mi tun(hol) le tukkhum sik in khawm hoidun om lo hang ii. A kontin khawm hmang i pa?

FBCI Bia inn thar hong lai ai zukhnak, zuktu FBCI media.

laivum pui ziatlam le vailam minung te pawl ai kin bia inn sa daan le hmang daan bang lo hnak rel vut tuh ising.

Ziatlam pawl minung lole kin laimi pawl ai Bia in sa daan le Bia inn hmang daan tu he tih in hmang kin tam de ii.

Khawm hmun ai pulpit heh mi zapui tohmun hmai ah dah keel ii. Pulpit ah ding kong in laibu dah thil cabuai( stand) pakhat om ai thuthantu, sermon le a dangdang in hmang kop tlang de ii. Cia mi cabuai heh a laiteng hmun ah dah tam de ii. Cabuai khial ah tohkheng mawi rohroh upa te lole hohatu te to hmun in hmang de ii. Khawm caan fangin hoitu te heh hmailam mipui lam hoi in to liang de ai, thureltu, lasatu, thuthantu, le lahoitu te pawl heh a hmailam heh sik thil lo in a khiallam, a tun( a hol) lam ian sik ngah de ii. Thureltu heh a song phalo caan fangin heh a laukulhnak tu a thurel au lakli ah a song hnawm hlivua suak vut selai a khial mi rinsantlak rohroh to tu liang te pawl tu a rin neu hnim tuh thliahthlo ceh i menma hang. Naupang te heh nipui zing zinglam nipui tlawng ( Sunday school) kai ruai de ai zapui khawm caan fangin kha nau sen ee, sen lo ee ti om lo hmunkhat ah to tlang liang de ai ron rung, rak rung muahmo thureltu pa in a thurel lak ah kha hnaihnok kul roh caan om de ii.

Vailam pawl minung te lole vailam hleng laimi pawl ai kin bia inn sa daan tu a tlangpui in he tih ii.

Vailam pawl ai a bia inn sa daan tu a lenglam in tu hall (inn kawlawng) pui menma vuah thai ii. A song lut fangin GPS kul thai pawl lolek in sa tam vek ii. Vailam pawl khawm daan tu naupang le upa heh a caan bangdun in khawm tam ii. Naupang tetu zirhtu te thawn khaan dang ah a mah te neu in caan hmang ve ai, upa te kha mah te neu in caan hmang fangin naupang te kap lianglo, au lianglo za pha om in thuthangpha relhnak pha neu ngai lingleng thil ai thatho thai ngai ii. Vailam hleng laimi te tamsawn khawm hmun a pulpit ah tohkheng mawi rohroh in dah liang om lemlo ii. Cabuai neu pakhat le misic instrument tibang pawl ian dah de ai, caan awhtu le caan hmangtute pawl amah te caan khim lekhaw hmai ah suak in caan hmang de ai a ben ve le a tohmun ah to sal ngerngo de ii. Caan naitute pawl tu hmasaber tohkheng lole a hiang lam deuh ah tohhmun nai ai cia ta ah amah te caan hleng tuh iang in to tlang liang vek de ii. Khawm kawitu hmuahhmuah le thureltu(sermon) tu in mi tukkhum, zaang, lole mi tun(hol) sik pha li le sik li kul in om lo hang ii.

Tuntu he hmuah in com rih aa sing khaw a dang kha rel pha tomroh om tuh lai ii. He mi pulpit thu ah tu ziatlam pawl in kha vailam pawl hmang daan cuung ve pha maw? Pha lo? Comment ah na hlir meng ing.

Bawi Hlawn Mang 

Camkhat USA, Indiana, Indianapolis, Mirion country, beach grove.